2011 ခုနှစ် ဖေဖော်ဝါရီလ 24 ရက်မှ 25 ရက်နေ့အထိ ထိုင်းနိုင်ငံ ချင်းမိုင်မြို့တွင်(MAP Foundation) မှ ကြီးမှူး၍ နိုင်ငံတကာ အလုပ်သမား နှီးနှောဖလှယ် တွေ့ဆုံပွဲကို 2 ရက်တာ ကျင်းပခဲ့ပါသည် ..
ထို တွေ့ဆုံပွဲတွင် ထိုင်း၊ မလေးရှား၊ ကမ္ဘောဒီယား၊ အိန္ဒိယ၊ မြန်မာ စသည်တို့မှ အလုပ်သမားရေး ဆောင်ရွက်နေသော အဖွဲ့အစည်းကိုယ်စာလှယ်များ၊ သမဂ္ဂခေါင်းဆောင်များ၊ အလုပ်သမား လှုပ်ရှားမှု ခေါင်းဆောင်များ စုစုပေါင်း လူဦးရေ 70 ကျော် တက်ရောက်ဆွေးနွေးခဲ့ကြပါသည်။
ထိုင်းနိုင်ငံ မီးရထားအလုပ်သမား သမဂ္ဂများအဖွဲ့ချုပ် ဒုဥက္ကဌ (Mr. Sawit Kaew Wan) မှ ထိုင်းနိုင်ငံတွင်းရှိ အလုပ်သမားသမဂ္ဂများနှင့် သူတို့ရဲ့ ရပ်တည်ချက်များ ၊ ထိုင်းအလုပ်သမားများမှ ရွှေ့ပြောင်းအလုပ်သမားများပေါ်ထားရှိသည့် အမြင်သဘောထားများနှင့် ရွှေ့ပြောင်းအလုပ်သမားများ အနေနှင့် ထိုင်းအလုပ်သမားသမဂ္ဂများတွင် အဖွဲ့ဝင်အဖြစ် ၀င်ရောက်နိုင်ရေးအခြေနေများကို အသေးစိတ် တင်ပြခဲ့ပါသည်။ ၄င်းမှ ဆက်လက်၍ ထိုင်းနိုင်ငံတွင်း အလုပ်သမား ဦးရေ 38.5 သန်းခန့်ရှိရာ ရွှေ့ပြောင်းအလုပ်သမား ဦးရေမှာ 3.4 သန်း ခန့်ရှိကြောင်းနှင့် ထိုင်းအလုပ်သမားသမဂ္ဂများအနေဖြင့် အလုပ်သမားများ၏ လုပ်အားခနှင့် အခွင့်ရေးများ တန်းတူရရှိအောင် ဆက်လက် လုပ်ဆောင်သွားမည်ဖြစ်ကြောင်း ပြောကြားခဲ့ပါသည်။
မလေးရှား၊ အိန္ဒိယ၊ ကမ္ဘောဒီယား၊ စသည့်နိုင်ငံများမှ အလုပ်သမားသမဂ္ဂ ခေါင်းဆောင်များမှလည်း သူတို့နိုင်ငံ၏ အလုပ်သမားများအကြောင်း၊ အလုပ်သမားသမဂ္ဂများ အကြောင်းနှင့် သူတို့၏ ရပ်တည် ချက်များအကြောင်းကို အသေးစိတ် ရှင်းလင်းတင်ပြခဲ့ကြပါသည်။
ထိုင်းနိုင်ငံ တာ့က်ခရိုင် မဲဆောက်ဒေသမှ အလုပ်သမားရေး ဆောင်ရွက်နေကြသော လူ့ဘောင်သစ် ဒီမိုကရက်တစ်ပါတီ (DPNS)၊ မြန်မာအလုပ်သမားများကွန်ယက် (BW- Network)၊ မြန်မာနိုင်ငံရှေ့နေများကောင်စီ(BLC)၊ ရောင်ခြည်ဦးအလုပ်သမားများအဖွဲ့ (YCOWA)၊ ရခိုင်အလုပ်သမား လှုပ်ရှားမှုအဖွဲ့ (ALC)၊ ထိုင်းနိုင်ငံတောင်ပိုင်း ဖန်ငဒေသမှ ရွှေ့ပြောင်းအလုပ်သမားများအရေး ဆောင်ရွက်နေကြသော အဖွဲ့အစည်းများနှင့် အလုပ်သမားကိုယ်စာလှယ်များမှလည်း မိမိတို့ဒေသရှိ ရွှေ့ပြောင်းအလုပ်သမားများ၏ အခြေအနေများ၊ ရွှေ့ပြောင်းအလုပ်သမားများအနေဖြင့် ထိုင်းအလုပ်သမား သမဂ္ဂများတွင် အဖွဲ့ဝင်အဖြစ် ပါဝင်နိုင်မှုအခြေနေများကို တင်ပြ ပြောကြားခဲ့ပါသည်။
0 comments:
Post a Comment