ထိုင်းနိုင်ငံ ရနောင်းမြို့တွင် ဖွင့်လှစ်ထားသော ယာယီနိုင်ငံကူးလက်မှတ်ရုံး ဆိုင်းဘုတ် (ဓာတ်ပုံ - ဧရာဝတီ)
ရနောင်းမြို့မှ ယာယီ နိုင်ငံကူးလက်မှတ် ကိုင်ဆောင်ထားသူ ကိုကျော်ဇေယျက “အရင် ပတ်စပို့တွေကတော့ ပြီးခဲ့တဲ့ လကုန်အထိ ၃ နှစ်ပဲ ရခဲ့တယ်။ အခု ပတ်စပို့ လုပ်ချင်တဲ့သူတွေက ပွဲစားတွေနဲ့ ချိတ်လုပ်ရတယ်” ဟု ပြောသည်။
ယာယီ နိုင်ငံကူးလက်မှတ်များကို ဘန်ကောက်ရှိ မြန်မာသံရုံးတွင်လည်း ပြုလုပ်ပေးနေကြောင်း၊ သို့သော် ယာယီ နိုင်ငံကူးလက်မှတ် သက်တမ်းတိုးမှုများကို ပွဲစားများမှတဆင့် ဈေးပိုပေးရကြောင်း သိရသည်။
ကိုကျော်ဇေယျက “အရင်ကဆို ၂ နှစ် သက်တမ်းတိုးဖို့ ဘတ် ၅၀၀ (ကျပ် ၁၃၀၀၀ ခန့်) ပေးရတယ်။ အခုဆို ဘတ် ၁၉၀၀ (၄၉၄၀၀ ကျပ်ခန့်) အထိ ပေးရတယ်” ဟု ပြောသည်။ ထိုသို့ ပေးပြီးလုပ်ကြသည်မှာ သက်တမ်းတိုးရန် နယ်စပ်သို့ ပြန်သွားရခြင်း၊ ထိုင်းဘက် ပြန်ဝင်ရခြင်း စသည်တို့ကို မလုပ်လိုသောကြောင့် ဖြစ်ကြောင်း သိရှိရသည်။
ထိုင်းနိုင်ငံတွင် အလုပ်လုပ်ခွင့်သက်တမ်း ၄ နှစ်ပေးထားသော်လည်း ယာယီ နိုင်ငံကူးလက်မှတ်က ၃ နှစ်သက်တမ်းသာ ရှိသဖြင့် အခက်အခဲများရှိကြောင်း၊ ထို့ကြောင့် ထိုင်းအစိုးရနှင့် ညှိနှိုင်း၍ ၆ နှစ်အထိ သက်တမ်းတိုးပေးခြင်းဖြစ်ကြောင်း ပြည်ပလုပ်သားရေးရာနှင့် လူကုန်ကူးမှုဆိုင်ရာ သုတေသီ စာရေးဆရာ ၀င်းနိုင်ထွန်းကို ကိုးကား၍ Eleven Media Group က သတင်းတွင် ဖော်ပြထားသည်။
ယာယီ နိုင်ငံကူးလက်မှတ် သက်တမ်းများ တိုးမြှင့်ပေးခြင်းနှင့် အတူ ပွဲစားများကလည်း မြန်မာအလုပ်သမားများထံမှ ငွေပိုတောင်းပြီး အမြတ်ထုတ်မှုများ များပြားလာမည်ဟု ထိုင်းနိုင်ငံ အခြေစိုက် လူ့အခွင့်အရေးနှင့် ဖွံ့ဖြိုးရေး ဖောင်ဒေးရှင်းမှ အတိုင်ပင်ခံ အန်ဒီ ဟောလ်က ပြောသည်။
မြန်မာသံရုံးက ပွဲစားများဆောင်ရွက်ခြင်းကို လက်ခံပေးခြင်းများရှိပြီး ယာယီ နိုင်ငံကူးလက်မှတ် ထုတ်ပေးရေး စိစစ်မှုတွင် လာဘ်ပေးလာဘ်ယူမှုများ ရှိနေသည်ဟုလည်း အန်ဒီ ဟောလ်က ထောက်ပြသည်။
၂၀၀၉ ခုနှစ် ဇူလိုင်လအတွင်း ယာယီ နိုင်ငံကူး လက်မှတ်များကို ထိုင်း-မြန်မာ နယ်စပ် ဒေသများ၌ ရုံးများ ဖွင့်လှစ်၍ ထုတ်ပေးခဲ့ပြီး မြန်မာရွှေ့ပြောင်း အလုပ်သမား ၅ သိန်းခန့် ယာယီ နိုင်ငံကူးလက်မှတ်များ ပြုလုပ်ပြီး ဖြစ်သည်ဟု သိရသည်။
ထိုင်းနိုင်ငံအနှံ့တွင် မြန်မာပြည်သား စုစုပေါင်း ၂ သန်းမှ ၄ သန်း အထိရှိသည်ဟု အလုပ်သမားအဖွဲ့များက ခန့်မှန်း ထားကြသည်။
ဧရာဝတီသတင်းဌာနမှ ကူးယူဖော်ပြပါသည်။
0 comments:
Post a Comment